قصيدة حول زلزال 14 ماي 2010

بسم الله يامعين
والصلاة على محمد الأمين
يارب يا قاوي يا متين
يا محرك الكون في رمشة عين
ألطف بعبادك يا كريم
وأعطينا رحمتك يا رب العالمين
الزلزال ذكري للذاكرين
كون معانا في الشدة يا معين
وفي الجمعة كنا ملمومين
ضرب زلزال خمسة فاصل إثنين
في الجامع جينا هاربين
رجعنا الامام بكلامو الزين
صلينا صلاة المزروبين
قالوا بني يلمان مضرورين
قالو فيها زوج موتى والباقي مجروحين
الديار والبطيمات رايبين
وسيارات الاسعاف تنقل في المجروحين
لحقت الحماية والسلطات في الحين
تنصب الخيم في كل مكان
خرجت رجال وأطفال وكل النسوان
يا من تستنى التفاح والبنان
الزلزال ضرب ونوغة وبني يلمان
جابو المواد الغذائية
والناس تضارب عليها صباح وعشية
الخاوة والجيران عادوا ماهم متفاهمين
والناس تضارب على القواطين
أتشينا والمندرينا
والزلزال يضرب فينا
الجريوات والزردية
وهزة تضرب إرتدادية
الطعام والشخشوخة
والناس من الهزة مخلوعة
لوبيا وعدس
والناس على السراق تبات تعس
الحوت والسردين
والناس على القواطين تسب الدين
الثوم والبصلة
لتهدر معاه تولي في حصلة
النعنان و الكسبر
والناس على بعضها ولات ما تصبر
الخبز والحليب
وكلام الناس ولى أكاذيب
الدقيق والفرينا
والمطر تصب علينا
الدلاع والبطيخ
والناس عادت من الزلزلة الطيح
رانا قي وقت القمح والشعير
والناس تسوات كالغاني كالفقير
حسوة بالفول
وعلى أفعال الناس ما عندي ما نقول
لحم النعجة والدجاج
والناس في الزلزلة ولات تمشي بالاعوجاج
الفلفل والطماط
الزلزال يضرب العشيشات وخراط
سلق والفرياس
والناس أجلت لعراس
سلاطة وزيتون
والبكالوريا في القيطون
قازوز والجي
قالوا الزلزلة مازلت أجي
مقيرطات وزلابية
والامتحانات داروهم بالزربية
واش كنا واش كاين
كنا متفاهمين ولينا متعادين
من عز اللومو والجافيل
ولينا ساكنين في القواطين
واش كنا واش كاين
كنا في البنيان الزين
ولينا في الفوايل هاملين
والصلاة على نبينا
في يوم الزحمة يشفع فينا


من إعداد : جودي - ع
كتـــابة : جودي - ص


نحن ننتظر آرائكم